Benzeno

O benzeno^[1] ye, en quimica, un hidrocarburo ciclico aromatico, de formula C₆H₆). A la temperatura y presión ordinaria, ye un liquido incoloro, poco soluble en augua y con un punto d'ebullición de 80,1 °C.

A molecula d'o benzeno ye constituita por seis atomos de carbonio, formando un aniello hexagonal. A representación d'o benzeno amostrando os tipos d'enlaces entre os atomos constituyents resulta muit embolicata ya que os electrons que forman os enlaces se troban deslocalizatos, y por ixo por un regular se substituyen por o esquema d'as dos formas equivalents mesomeras de Kekulé, o descubridor d'a suya forma.

O benzeno, una d'as primeras materias fundamentals d'a industria quimica organica, s'obtiene por destilación fraccionata d'os aceites lichers procedents d'a destilación d'o gudrón d'hulla y a partir de productos d'o petrolio.

Se fa servir ta fer substancias intermediarias en a fabricación de merecinas, colorants y atros compuestos organicos, cuero artificial, linoleum, verniz, y laca y como disolvent d'uso muit cheneralizato.

1. ↑ (an) Diccionario ortografico de l'aragonés (Seguntes la Propuesta Ortografica de l'EFA). Versión preliminar. Estudio de Filología Aragonesa. ISSN 1988-8139. Octubre de 2022.