Google

Google isch e Suechmaschine vom amerikanische Undernääme Google Inc. und isch d Internet-Suechmaschine, wo am maiste brucht wird. Dr Vorlöifer BackRub het 1996 agfange, sit em 27. Septämber 1998 isch d Suechmaschine under em Naame Google onläin. Sit denn het sich iiri Oberflechi nume echli veränderet. Dank em Erfolg vo dr Suechmaschine und dr kontextsensitive Wärbig us em AdSense-Brogramm het s Undernääme Google Inc. e Serii vo witere Software-Löösige chönne finanziere, wo mä über d Google-Site zune chunnt. S Kärngschhäft vo Google isch allerdings immer no d Suechi. Es het Zite gee, wo dr Konkurränt Yahoo Google zaalt het, zum d Daatebanke vo Google für die äigeni Suech z benütze.