Dit artikel is gesjreve (of begós) in 't AGL. Laes hie wie v'r mit de versjillende saorte Limburgs ómgaon.
Karessere is e Limburgs waord[1] veur 't Nederlands aaien of strelen, 't Duutsj streicheln of streichen, 't Frans caresser en 't Ingelsj to stroke. 't Beduujt zoeget wie: "Mit de handj (euver emes) sjtrieke"[2]. Karessere is ouch waal, "e lies lichamelik kentak, die genaegeheid oetdrökke zal en euver de taszin van 't vel waorgenomme weurt. Karessere betröf 't sósjaal-emotioneel gebeed van interpersoonlike kemuniekasie, mer vènj ouch plaats tösje miensj en deer"[3]. Etymologisch gezeen kump 't van 't Frans: caresser meint 't "faire des caresses", ofwaal 't make van caresses. 'n Caresse is dan: "'n mark van taerheid, genaegeheid en sensualiteit door 't kónstant lies boezjere euver 't lief van emes"[4]. 'n Anger synoniem is käöre. Dees twie synonieme zien de gankbaar wäörd op 't Algemein Gesjreve Limburgs veur de baovegezagte besjrieving.