Koningsdag, vroeër Prinsessedag (1885-1890) en Koninginnedag (1891-2013), is 'n nasionale feesdag in Nederland, Curaçao, Sint Maarten en Aruba. Op hierdie dag word die verjaardag van die koning of koningin gevier.
Koninginnedag is destyds ingestel om die verjaardag van koningin Wilhelmina (31 Augustus) te vier. Vanaf 1949 tot 2013 is die fees op 30 April gevier, wat die verjaardag was van koningin Juliana, wat in 2004 oorlede is. Indien die dag op 'n Sondag sou val, is dit op die voorafgaande Saterdag gevier.
Koningsdag word gevier met (ou Hollandse) feeste en vrymarke. Op hierdie dag besoek koning Willem-Alexander van die Nederlande en sy familie (soms twee) plekke in die land (in 2022 Maastricht).
Op die Koninginnedag in 2013 het Beatrix ten gunste van haar oudste seun Willem-Alexander geabdikeer.[1] Sedert 2014 word dit Koningsdag genoem en op 27 April gevier.[2]