Et oustpommersk is en oustelik dialekt van et neadersassisk, dat vrogger in Achterpommeren espröäken wördden ten ousten van de destyds düütske stad Stettin, dee sinds 1945 de poolske name Szczecin voort.
Disse neadersassiske varieteit is döär 13. eywske kolonisten üüt westeliker eleagen streaken meadenöämen en wördden gangbår under de geheyle pommerske bevolking, howel et slavisk van de oorsprungelike bevolking as en substraat in en reaks archaiske woorden bewaerd bleyv, vöäral in de meyst oustelike gebeden wår et slavisk eyrst in de loup van de 18. en 19. eyw üütstörv.
Nå et ende van de Tweyde Wearldoorlog wördden souwat de geheyle düütske bevolking, en dårmead düs ouk de spreakers van et oustpommersk, üüt Achterpommeren nå et westen verdreaven, wår se sumtyds dialekten van höär nye ümgeaving, mär noch vaker as se in de geboardestreak gewoan waren, jüüst et hougdüütsk as dagelikse ümgangsspråke oavernammen. Et oustpommersk is as gevolg dårvan nun sou good as üütestörven.
Allinnig in Brasilie spreaken de olde lüde in de kolonys van pommerske immigranten, in de ståten Espírito Santo, São Paulo en Paraná, et dialekt dat bekend steyt as pomerano noch.[1]