Quantenfeldtheorie

D Kwantefäldtheorii (QFT) isch e Gebiet vo dr theoretische Füsik, wo Brinzip us de klassische Fäldtheorie (zum Bischbil dr klassische Elektrodünamik) und dr Kwantemechanik kombiniert, zum d Theorii z erwitere. Si goot über d Kwantemechanik use und beschribt Däili und Fälder äihäitlig. Drbii wärde nit nuume sogenannti Observable (also beobachtbari Gröössene wie Energii oder Impuls) kwantisiert, sondern au die wäggselwirkende (Däili-)Fälder sälber; Fälder und Observable wärde also analog behandlet. D Kwantisierig vo de Fälder bezäichnet mä au as Zwäiti Kwantisierig. Die berücksichtigt explizit dass Elementardäili entstöön und vernichdet wärde (Bäärlierzüügig, Annihilazioon).

D Methode vo dr Kwantefäldtheorii wärde vor allem in dr Elementardäilifüsik und in dr statistische Mechanik aagwändet. Mä underschäidet drbii zwüsche relatiwistische Kwantefäldtheorie, wo die spezielli Relatiwidäätstheorii berücksichtige und hüfig in dr Elementardäilifüsik aagwändet wärde, und nit-relatiwistische Kwantefäldtheorie, wo zum Bischbil für d Festkörperfüsik relewant si.

D Objekt und Methode vo dr QFT si füsikalisch motiwiert, au wenn vili Däilberiich äng mit dr Mathematik zämmehänge. Die axiomatischi Kwantefäldtheorii brobiert, d Grundlage und Konzept in ene mathematisch rigorose Raame zämmezfasse.