Rollo | |
![]() | |
Graaf van Rouen
| |
Opgevolg deur | Willem I van Normandië |
---|---|
Persoonlike besonderhede
| |
Gebore | omstreeks 835/870[1][2][3] Skandinawië |
Sterf | 928/933 Normandië |
Kind(ers) |
|
Religie |
|
Rollo (Normandies: Rou, Rolloun; Oudnoors: Hrólfr; Frans: Rollon; sterf tussen 928 en 933) was 'n Wiking en die eerste heerser oor Normandië; vandag 'n streek in Noord-Frankryk. Hy was een van die beste Noorse krygsmanne en het 'n permanente basis op Frankiese gebied in die vallei van die benede-Seine gestig. Na die Beleg van Chartres in 911 het Karel die Eenvoudige, koning van die Wes-Frankiese Ryk, grond tussen die monding van die Seine en wat vandag bekend staan as Rouen aan die Wikings toegestaan, in ruil daarvoor dat Rollo toestem om sy plundery stop te sit, trou aan die koning te sweer, hom bekeer na die Christendom, en 'n belofte aflê om die Seine se monding te verdedig teen Wiking-plunderaars. [4][5]
Die eerste geboekstaafde gebruik van die naam Rollo, as synde die leier van hierdie Wiking-setlaars, kom voor in 'n oktrooi uit 918. Hy het voortgegaan om tot ten minste 928 oor Normandië te heers. Hy is opgevolg deur sy seun Willem I as heerser van die hertogdom van Normandië, wat deur Rollo gestig is. [6] Rollo se nageslag en die van volgelinge het weens vermenging met die inheemse Franke en Gallo-Romaanse bevolking van die gebiede wat hul beset het weldra bekend geword as "Normandiërs". As gevolg van die Normandiërs se verowering van Engeland, Suid-Italië en Sisilië oor die volgende twee eeue het hul afstammelinge vanaf die 11de tot 13de eeu Engeland, groot dele van Ierland, die Koninkryk van Sisilië en Antiogië regeer. Sodoende het hulle 'n blywende nalatenskap gelaat wat die geskiedenis van Europa en die Levant grootliks beïnvloed het. [7]