Seneca

Dr Lucius Annaeus Seneca, mäistens Seneca dr Jüngeri (* öbbe im Joor 1 z Corduba; † 65 n. d. Z. in dr Nööchi vo Rom), isch e römische Filosoof, Dramatiker, Naturforscher, Staatsmaa gsi und as Stoiker äine vo de Schriftsteller, wo zu sinere Zit am mäiste glääse worde isch. Sini Reede, won en bekannt gmacht häi, sin verloore gange. Vom Joor 49 aa isch er dr maassgääblig Erziejer vom spöötere Kaiser Nero gsi. Für zum dä uf sini zuekümftige Ufgoobe vorzberäite, het er e Dänkschrift verfasst, wiso es wiis sig, as Herscher mit Mildi z regiere (de clementia). Im Joor 55 isch er Suffektkonsul gsi. Aber so seer sich dr Seneca Müe gee het, dr Nero, won en äigesüchtigs und usschwäifends Tämpramänt ghaa het, z erzie, het er nume wenig Erfolg ghaa drbii. Zletscht het en dr Kaiser beschuldigt, er häig an dr pisonische Verschwöörig mitgmacht, und het em befoole, sich sälber umzbringe. Das het dr Seneca denn au gmacht.