De Valenzschaal is de butenste Schaal in de Elektronenhüll vun en Atom, de mit Elektronen besett is. In disse Schaal hollt sik de so nöömten Valenzelektronen op, de för dat Billn vun cheemsch Binnen mit annere Atomen praat staht. De Elektronenkonfiguratschoon vun de Valenzschaal präägt de cheemschen Egenschoppen vun de Atomen vun en cheemsch Element.
För de Elementen ut de Hööftgruppen kann de Valenzschaal bit to höchstens acht Elektronen opnehmen, dorvun twee in de s-Orbitalen un söss in de p-Orbitalen. Utnahmen dorvun sünd de beiden eersten Elementen Waterstoff un Helium, vun wegen dat dor blots de K-Schaal besett warrt. De is aver al mit twee Elektronen vull besett.
All de Eddelgasen (mit Utnahm vun’t Helium) hebbt acht Elektronen in de Valenzschaal. Na de so nöömten Oktettregel sünd cheemsch Verbinnen tomeist denn in en „bestännigen Tostand“, wenn all bedeeligten Atomen dör’t Opnehmen oder Afgeven vun Elektronen vun oder an den bunnen Partner (Ionenbinnen) oder dör Billn vun gemeensome Elektronenporen (Molekülbinnen) so’n „Eddelgaskonfiguratschoon“ opwiest.