WikiLeaks

An Wikileaks sarong organisasyon internasyunal, namomogtak sa Sweden^[1] na nagpupublikar nin mga padarang anonimo asin mga sensitibong mga dokumento hale sa mga gobyerno asin iba pang mga kasararoan, mga pribadong namamanwaan, manta na ihinihilom ninda an kagpadara. An websayt kaini, na pigbungsod kan 2006, pigpapadalagan kan The Sunshine Pres.^[2] An kaburunyogan pighayag na an kagporoon kaini mga Intsik na mga dissident, na katuwang an mga peryodista, mga matematiko, asin mga kompanya sa teknolohiyang industriya haleng Amerika, Taiwan, Europa, Australya, asin Sur Aprika. Mga artikulo sa peryodiko asin an The New Yorker na magasin (Hunyo 7, 2010) pigtutukdo si Julian Assange, sarong Australyanong peryodista asin aktibista sa Internet, bilang iyo an pamayong direktor kaini. ^[3] Poon kan nabungsod ini, an websayt naghayag na nagtalubo an database kaini sobra sa 1,2 milyon na dokumento,^[4] manta an mga video kaining pinapasali sa internet iyo an nababantog na gayo. Nagguno ini nin mga premyo huli sa mga report niyang kontrobersyal.

An Pentagon kan Amerika pigkondenar an websayt bilang sarong homa' sa seguridad nasyunal kan Estados Unidos manta an mga organisayon nin prensa pig'oomaw ini ta nagbubuyagyag kan mga gibo-gibong sala kan mga gobyerno sa kinaban, na kun dai nailawan dai maaaraman kan publiko.

Saro sa pinaluwas sa internet kaini na nag'iinit na marhay na bareta iyo an pagbuyagyag kaini kan mga gibogibo asin mga palakaw kan militar kan Estados Unidos sa pakikigera sa Apganistan, Pakistan asin sa Iraq, bagay na naukag na maray an gobyerno Amerikano ta dakul na bagay an ipigpaluwas na dapat mga tagonghilom nanggad ta may kuneksyon sa seguridad nasyunal. ^[5]

Alagad susog na ngane sa deklarasyon kan Wikileaks sa saiyang websayt mismo, "... an WikiLeaks sarong "non-profit media organization" maigot sa pagdarang mga mahahalagang bareta asin impormasyon sa publiko. Kami natao nin naiiba, nasisiguro asin anonimong paagi para sa mga independienteng parapahayag nin impormasyon sa enterong kinaban na hilom asin patago na magtao nin siring na mga bagay sa samong mga peryodista. Kami napabalangibog kan mga materyal na may etiko, pulitikal asin historikong halaga manta sinasaray mi an identidad kan mga taga'ambag ming anonimo. Sa siring na sistema, natao kami nin garantisadong paagi sa pagbuyagyag asin pagbiklad kan mga binabagat asin tuyong pigririrong na mga inhustisya."

1. ↑ Haddow, Douglas (7 April 2010). "Grim truths of Wikileaks Iraq video". The Guardian (London). http://www.guardian.co.uk/commentisfree/libertycentral/2010/apr/07/wikileaks-collateral-murder-iraq-video. Retrieved on 7 April 2010. "... a Sweden based non-profit website" 
2. ↑ Fundraising drive, wikileaks.org. Retrieved April 5, 2010.
3. ↑ McGreal, Chris. Wikileaks reveals video showing US air crew shooting down Iraqi civilians, The Guardian, April 5, 2010.
4. ↑ "Wikileaks has 1.2 million documents?". Wikileaks. Retrieved 28 February 2008. 
5. ↑ http://www.csmonitor.com/Commentary/the-monitors-view/2010/0726/Wikileaks-report-of-war-logs-about-Afghanistan-show-why-Obama-must-be-on-offensive