D Zikkurat, Ziqqurrat, Zikkurrat, Ziggurat oder Schiggorat, was uf Babylonisch öbbe „Götterberg“ odr so bedüted, isch ä Schtuefetämpel wien er für Mesopotamie typisch isch. Si beschtoht, ähnlig wie die ägyptisch Schtuefepyramide vom Pharao Dschoser, us mehrere quadratische oder rächteggige Blattforme, wo gege obe chliiner wärde, und so win ä chliine, heilige Bärg vo wiitem uf dr mesopotamische Schwemmebeni cha gseh wärde. Aber im Gegesatz zue dr ägyptische Pyramide isch uf dr oberschte Schtuefe von erä Zikkurat ä Tämpel gsi, wo nume d Brieschter hai dörfe ine go.
D Zikkurat vo Birs Nimrud isch bsundrig, wil dr Nebukadrezzar II. jedi Schtuefe em än andere Himmelskörper gweiht het: die underschti Schtuefe isch schwarz gsi und het em Blanet Saturn ghört, die zweiti orangi em Jupiter, die roti em Mars, die vierti isch goldig gsi und dr Sunne gweiht, d Schtuefe vo dr Venus isch grüen und die vom Merkur blau gsi. Die oberschti Schtuefe het em Mond ghört und isch silbrig gsi.
Dr Durm wo noch dr Bible z Babylon baut worden isch, isch son ä Zikkurat gsi.