12 results found for: “Google”.

Main result

Google

Google (Oetsproake: /guːgəl/) is ne internetzeukmesiene van Google LLC. Doarmet kö'j de meest oeteenlopende zaken opzeuken op t internet. Google is in 1998 op estartt duur Larry Page en Sergey Brin, twee ofstudeerden an de Universiteat van Stanford. Nöast websteas opzeuken kö'j met Google foto's, wetenskoppelike verhaandelingen, beuke, plaatsen en zeensweardigheden opzeuken. Google böd ook ne detailleerde, reagerende laandkaarte, dee ook as routeplanner woarket. Met Google Streetview kö'j via internet in de umgewing roondkieken. Hiervuur riedet der elken dag verskeaidene wagens van Google oawer de wearld, um de wearld vaste te leggen. Een antal bekeande zeensweardigheden hebt Google too eloaten um opnames te maken, zodet iej virtueel roondkieken köant. Wiedters kö'j bie Google nog een e-mailadres maken (Gmail), online opslagruumte innemmen (Google Drive), teksten skriewen (Google Docs) en gegewens online oetwesselen. Google hef een egen oonderzeukscentrum, wat nieje spölledinge probeert oet te deanken. Op dit ogenblik is Google gangs met Google Glass, nen komputer in brillenvorm, den as iej met de stemme bedenen köant. Rechtevoort is et vuur bedriewe onmeundig belangriek um eveunden te worden in de zeukmasjiene van Google, umdet de meeste leu doar et eerste begint met zeuken. Ze betaalt et Amerikaanse bedrief dus grif um öare adverteansies op de eerste webziede met zeukresultaten te kriegen.