'n CAM-plant vermag om snags wanneer dit koeler is koolstofdioksied op te neem en om te sit in malaat, die suurres van appelsuur wat vier koolstofatome besit. Oordag kan die plant sy stomata dighou om vogverlies te verminder maar tog koolstofdioksied aan die ensiem rubisco aanbied om daarmee fotosintese uit te voer. Die malaat word daarby gedekarboksileer en vorm dus die stoormeganisme.
Dit is 'n aanpassing wat veral by vetplante soos Mesembryanthemum nodiflorum aangetref word.[1] Die water wat vetplante in die vakuole van hul weefsels stoor, word dikwels ook gebruik om die snagsgevormde malaat te stoor.