Tamatiebredie is 'n eg Suid-Afrikaanse gereg wat gewoonlik van skaapvleis gemaak word en as hoofgereg bedien word. Dit word vir 'n lang tyd gekook, maar 'n drukkoker (stoompot) kan gebruik word om die tyd te verkort. Dit bevat bestanddele soos kaneel, kardamom, gemmer en naeltjies sowel as brandrissies.
Die gereg is oorspronklik van Nederlandse oorsprong, maar die woord "bredie" is van Maleisiese oorsprong. Dit is vir die eerste in die Kaap deur Maleiers gekook, meestal deur slawe wat na die kolonie gebring is. Die woord bredie verwys na oosterse spinasie. In tamatiebredie word tamaties natuurlik as 'n plaasvervanger vir spinasie gebruik. Pampoen, groenbone en waterblommetjies word ook soms gebruik.