Universiteit van Glasgow | |
---|---|
University of Glasgow | |
Die hoofgebou op Gilmorehill | |
Latyn: 'Universitas Glasguensis' | |
Leuse: | Via, Veritas, Vita |
Leuse in Afrikaans: | "Die Weg, die Waarheid, die Lewe" |
Leuse in Engels: | "The Way, the Truth, the Life" |
Gestig: | 1451 |
Tipe: | Openbare universiteit |
Befondsing: | £129.5 miljoen [1] |
Kanselier: | Kenneth Calman |
Rektor: | Aamer Anwar |
Prinsipaal: | Prof Anton Muscatelli |
Personeel: | 6 896[2] |
Studentetal: | 23 357[3] |
Voorgraadse studente: | 16 931 |
Nagraadse studente: | 6 426 |
Ligging: | Glasgow, Skotland, Verenigde Koninkryk 55°52′19″N 4°17′15″W / 55.87194°N 4.28750°W |
Webtuiste: | http://www.gla.ac.uk/ |
Die Universiteit van Glasgow is die vierde oudste universiteit in die Engelssprekende wêreld en een van Skotland se vier historiese universiteite.
Die universiteit is in 1451 in Glasgow gestig en is tans een van negetien tersiêre onderwysinstellings in die Verenigde Koninkryk wat by die top 100-akademiese instellings ter wêreld gereken word.
Die universiteit was in die 18de eeu 'n belangrike sentrum van die Skotse Verligting en was vanaf die 19de eeu 'n baanbreker in Britse tersiêre onderwys wat in die opvoedkundige behoeftes van studente uit die groeiende stedelike middelklas voorsien het, net soos dié van studente uit die hoër klas. Die Universiteit van Glasgow het studente vir 'n professionele loopbaan in die regte, geneeskunde, die staatsdiens, onderwys en die kerk opgelei. 'n Kleiner aantal studente het akademiese opleiding in die wetenskappe en ingenieurswese ontvang. Die universiteit is tans 'n lid van die Russell-groep van elite-universiteite en van Universitas 21.
Die Universiteit van Glasgow se hoofkampus is sedert 1870 op Gilmorehill in die West End van Glasgow geleë. 'n Aantal universiteitsgeboue is elders geleë: naby die meer Loch Lomond, in Millport (die Universiteit se Mariene Biologiese Stasie) en op die Crichton-kampus te Dumfries.
Die universiteit is die enigste in Skotland met fakulteite vir regte, geneeskunde, tandheelkunde en diergeneeskunde. Tans studeer 23 000 voor- en nagraadse studente uit 120 lande aan die universiteit.
Oud-studente van die universiteit sluit ses Nobelpryswenners, twee Britse eerste ministers en 'n aantal leiers van die grootste politieke partye in die Verenigde Koninkryk en Skotland in.