Anne Frank

D Annelies Marie „Anne“ Frank (* 12. Juni 1929 z Frankfurt am Main als Anneliese^[1] Marie Frank; † Februar oder Aafang März 1945 im KZ Bergen-Belsen) isch es dütsch-niderländischs Meitli vo jüdischer Härkumft gsi, wo 1934 mit synen Eltere und synere Schwöster Margot i d Niderlanden usgwanderet isch, zum de Verfolgig dur d Nationalsozialiste z entgah. Churz vor em Ändi vom Zweite Wältchrieg isch si denn glych em Holocaust zum Opfer gfalle. I de Niderlande het d Anne Frank vo Juli 1942 bis August 1944 mit irere Familie imene versteckte Hinderhuus z Amsterdam gläbt. I dem Versteck het si iri Erläbniss und Gedanke imene Tagebuech ufgschribe, wo nach em Chrieg als Tagebuech vo dr Anne Frank vo irem Vatter Otto Frank veröffentlicht worden isch.

S Tagebuech – wo de Vatter allerdings zimli gsträälet useggäh het – gilted als es historischs Dokumänt us de Zyt vom Holocaust und syni Autorin isch zur Symbolfigur gäge d Unmänschlichkeit vom Völchermord i de Zyt vom Nationalsozialismus worde.

1. ↑ Robert Kempner: Edith Stein und Anne Frank. S. 61.