Aphareus (Sohn des Perieres)

De Aphareus (altgriech. Ἀφαρεύς) isch i de griechischen Mythologie e König vo Messenie

De Aphareus isch de Soo vom Perieres und vo de Gorgophone. Er hett sini Halbschwöster Arene ghüroote, e Töchter vo de Gorgophone und em spartanische König Oibalos. Sini Chind sind d Zwilling Idas und Lynkeus, en andere Soo isch de Peisos. De Aphareus hett e noji Stadt gründet und die noch sinnere Frau Arene gnennt.

Wo de Neleus zom Perieres choo isch, well er vo sim Brüeder Pelias vertribe woren isch, do hettem de Aphareus e Chüstestraiffe ggee, well er mitem verwandt gsii isch. O de Lykos isch zom Aphareus choo und de isch vo sim Brüeder Aigeus us Athen vertribe wore. De Lykos hett z Andania d Myste grainigt und de Aphareus und d Arene und dene sini Chind i d Mysterie vo de Groosse Göttine iigwiicht. Und wo de Tyndareos vo sim Halbbrüeder Hippokoon us Sparta vertribe woren isch, hett de Aphareus de ono bi sich uufgnoo. S Graab vom Aphareus isch z Sparta zaiget wore.