Historismus (Kunst)

Dä Artikel behandlet d Stilepoche. Zu andere Bedütige vom Begriff «Historismus» lueg doo.

Dr Begriff Historismus bezäichnet in dr Stiilgschicht e Fenomeen, wo im 19. Joorhundert verbräitet gsi isch und zum Däil no ins 20. Joorhundert noochgwirkt het, und wo mä bin em – vor allem in dr Archidektuur – uf elteri Stiilrichdige zrugggriffe und die mänggisch au mitenander kombiniert het.

Stilistischi Underarte si u. a. d Neoromanik, d Neogotik, d Neorönessans und dr Neobarock. In sinere Spootfaase isch parallel dr Juugedstiil entstande, wo dr Historismus zum Däil beiflusst het. E Gegebeweegig isch am Aafang vom 20. Joorhundert mit dr Reformarchidektuur ufchoo, wo sich spööter die klassischi Modärne us ere entwigglet het.

Dr Historismus het vo 1850 bis vor em Erste Wältchrieg d Kunst und d Archidektur brägt. Aber au spööter si historistischi Motiv immer wider emol ufdaucht, wie im monumentale Neoklassizismus. Zum Däil wird bis hüte historistisch baut, bsundrigs sit in dr Postmodärne wider historischi Bauforme ufgriffe worde si. Modärni historistischi Baute bezäichnet me au as neohistoristisch.