Kochbanane

D Chochbanaane, au Gmüesbanaane, Määlbanaane oder Pisangfiige, span. „plátano“, z Brasilie „banana-da-terra“, in vile afrikanische Sprooche Platan oder Plantan, isch d Frucht vo vile Sorte vo dr Banaaneart Musa × paradisiaca. D Chochbanaane isch in e Hufe dropische und subdropische Regione vo Amerika, Afrika und Asie e Grundnaarigsmiddel (äänlig wichdig wie d Härdöpfel in Öiropa) und isch as Usduschmääl für Zöliakiipaziänte gäignet. Im Geegesatz zur Desserbanaane cha mä sä erst roh ässe, wenn si vollrif isch, das häisst wenn d Schaale vo dr Frucht (fast) vollständig schwarz und s Fruchtfläisch ganz wäich isch. Mäistens wird si kocht oder in Sträife oder Schiibe gschnitte und frittiert oder bröötlet. Hützudags cha mä sä au im dütschsproochige Ruum chaufe.