Messiah

Dr Messiah (HWV 56, dt. Der Messias) isch en Oratorium vom Georg Friedrich Händel uf Bibelteggst in ere Zämmestellig uf Änglisch vom Charles Jennens für vier Soli (SATB), Chor und Orchester. Es isch e Verdoonig vo dr christlige Glaubensleer im Bezuug uf e Messias und basiert uf dr King-James-Bible und uf em Book of Common Prayer. Es isch im Summer vo 1741 komponiert und am 13. April 1742 z Dublin urufgfüert worde.

S Wärk ghöört bis hüte zu de populäärste Bischbil vo gäistliger Muusig im christlige Oobeland. In sine drei Däil umfasst s die christligi Häilsgschicht und alttestamäntligi Brofezeijige vo Brofeete wie em Jesaja, s Lääbe vom Jesus, wo as Erfüllig vo de Brofezeijige gsee wird, si Geburt, si Dood am Chrüz und si erhoffts zwäits Choo. S Lääbe wird zwaar vor allem im Nöije Testamänt beschriibe, dr Teggst vom Oratorium goot aber vor allem uf s Alte Testamänt zrugg. S Halleluja aus dem Wärk isch des bekannteschte Stügg draus ond wohl au s bekannteschte vom Händel ieberhaubt.

Dr Messiah isch as Benefizkonzärt z Dublin urufgfüert worde und d Lüt si begäisteret gsi. Z London hingeege het s wie scho bi Israel in Egypt Stimme gee, wo kritisiert häi, ass Bibelwort im ene wältlige Theater brucht wärde und bim Messiah isch no drzue choo, ass Zitat us de Evangelie für en Oobeunderhaltig verwändet worde si. No Joor spööter isch s Wärk as blasfemisch verurdäilt worde.