| Dialäkt: Züritüütsch |
Mundart isch s Heftli vom Mundartforum, em früenerige Verein Schweizerdeutsch und em na früenerigere Bund Schwyzertütsch. Es chunt sit 1948[1] emaal mee und emaal weniger vil use und häd im Lauf vo siinere Gschicht verschideni Näme ghaa. Vo 1999 bis 2008 isch s Heft under em Name Mundart. Forum des Vereins Schweizerdeutsch usecho, ab dänn bis 2013 under em Name SchweizerDeutsch und sit 2016 wider under em Name Mundart – zeerscht mit em Undertitel Mitteilungsblatt des Vereins Schweizerdeutsch und jetz mit em Undertitel Mitteilungsblatt des Mundartforums. Di mäischten Artikel sind uf Standardtüütsch gschribe. Es häd aber vo Fall zu Fall au literarischi Biiträg uf Alemannisch.
D Zytschrift SchweizerDeutsch häd en hööchen Aaspruch ghaa. De Name «Heftli» häd de Redakter dän gaar nöd wele ghööre. SchweizerDeutsch häd vil Choschte gmacht, aber nie gnueg Lüüt, wos aboniert händ,[2] und chuum Inseraat ghaa. Au di jetzig Version vo de Mundart, wo aber nu na äimaal im Jaar usechunt, wott mee weder nu es Heftli sy, und s häd amig au spraachwüsseschaftlichi Artikel dine.