Somalia

Jamhuuriyadda Soomaaliya (Somali) جمهورية الصومال Jumhūriyyat aṣ-Ṣūmāl (arab.) Republik Somalia
Amtsspraach	Somali, Arabisch[1]
Hauptstadt	Mogadischu
Regierigssitz	Baidoa
Staatsoberhaupt	Hassan Sheikh Mohamud
Regierigschef	Mohamed Hussein Roble
Flächi	637.657 km²
Iiwohnerzahl	9 bis 12 Millione (Stand 2006)
Bevölkerigsdichti	13,90 Iiwohner pro km²
Währig	Somalia-Schilling (SOS)
Unabhängigkeit	26. Juni 1960 verchindet, 1. Juli 1960 anerkännt
Nationalhimne	Somaliyaay toosoo
Zitzone	MSK (UTC +3)
Kfz-Kennzeiche	SO
Internet-TLD	.so
Vorwahl	+252

Somalia (Somali Soomaaliya; arabisch الصومال‎, DMG aṣ-Ṣūmāl) oder Bundesrepublik Somalia isch e federale Staat im usserschte Oschte vu Afrika am Horn vu Afrika. Dr Name chunt vum Volk vu dr Somali, wu s Bevelkeigsmee bildet un au in der Nochberländer aasässig isch.

S hitig Somalia isch us em Zämeschluss vu dr Kolonialbiet Britisch- un Italienisch-Somaliland entstande, wu anne 1960, im „Afrikanische Johr“, zäme unabhängig wore sin. S Staatsbiet gränzt im Oschte an dr Indisch Ozean, im Norde an dr Golf vu Aden, im Weschte an Dschibuti un Ethiopie un im Sid an Kenia. Noch em Sturz vu dr autoritäre Regierig unter em Siad Barre anne 1991 het s wäg em Burgerchrieg iber 20 Johr lang kai funktionsfähigi Zäntralregierung me gee. D Ibergangsregierige, wu ab 2000 unter em Schutz vu dr internationale Staategmainschaft bildet wore sin, sin zimli erfolglos blibe, si hän zytwys nit emol d Hauptstadt unter ihri Kuntroll brocht. Wyti Dail vum Land sin in Händ vu lokale Clan, Chriegsherre, radikal-islamistische Gruppe oder Pirate gheit.

Uf em Staatsbiet hän si mit dr Zyt verschideni De-facto-Regime bildet. Vu däne strät aber nume Somaliland im Nordweschte syt 1991 no internationaler Anerkännig as aigeständigi Nation. Di ibrige, dodrunter Puntland, Galmudug un Azania, stelle Aasprich uf Autonomy as sälbschtverwaltete Dailstaat, hän aber d Idee vu me gmainsame somalische Staat nit ufgee. Mit dr neie Verfassig, wu am 1. Augschte 2012 in Chraft drätten isch, sin die autonome Dailstaate jetz Mitglider vu dr neie Bundesrepublik Somalia (vorhär Republik Somalia). Erfolg gege di radikal-islamistische Milize anne 2012 hän s megli gmacht, im Augschte 2012 zum erschte Mol au wider e gmainsami somalischi Regierig z wehle, wu ne Reorganisation vu staatlige Strukture cha aagoo.

1. ↑ The Transitional Federal Charter of the Somali Republic Archivlink (Memento vom 9. Februar 2007 im Internet Archive)