Wolfgang Amadeus Mozart

Dr Wolfgang Amadeus Mozart (* 27. Jänner 1756 z Salzburg; † 5. Dezämber 1791 z Wien) isch e Komponischt in dr Zyt vu dr Wiener Klassik gsi. Syy vollständige Daifnamme isch Johannes Chrysostomus Wolfgang Theophilus Mozart gsi, är sälber het sich zmeischt Wolfgang Amadé Mozart gnännt.

Syyni Eltere sin dr firschtbischeflig Kammermusikus Leopold Mozart, wu uf berueflige Grind vu Augschburg in s Firschtbischtum Salzburg chuu isch un ab 1757 Hofkomponischt un ab 1763 Vizekapellmeischter gsi isch, un d Anna Maria Pertl vu Sankt Gilgen.

Dr Mozart isch ein vu dr wichtigschte europäische Komponischte. Syy Wärch isch hite in dr ganze Wält populär un zellt in dr klassische Musik zue däne mit dr greschte Bedytig. Är het di musikalische Gattige „Konzert“ un „Sinfonii“ zuen eme Hegschtpunkt brocht, noch ihm sin die wichtigischte Forme vu dr klassische Orcheschtermusik blibe, s glych giltet fir d „Sonate“. Derzue het er wichtigi Opere gschribe, wu bis hit gärn gspilt wäre. Syyni Kompositione wäre im Köchelverzeichnis ufglischtet.