Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Marlene Dietrich | |
---|---|
Marlene Dietrich en 1961 en una escena d'a cinta Judgment at Nuremberg. | |
Información personal | |
Nombre real | Marie Magdalene Dietrich |
Calendata naiximiento: | 27 d'aviento de 1901 |
Puesto naiximiento: | Berlín (Imperio Alemán) |
Calendata muerte: | 6 de mayo de 1992 |
Puesto muerte: | París (Francia) |
Ocupación: | Actriz y cantaire |
Conchuche: | Rudolf Sieber (1924-1976) |
Fillos: | Maria Riva |
Sitio web: | www.MarleneDietrich.org |
Premios Tony: | |
-1968: Premio Tony Especial |
Marlene Dietrich (maɐˈleːnə ˈdiːtrɪç, nombre artistico de Marie Magdalene Dietrich), naixita de Berlín (Imperio Alemán) o 27 d'aviento de 1901 y muerta en París (Francia) o 6 de mayo de 1992, estió una actriz y cantaire alemana, que desembolicó a mayor parte d'a suya carrera cinematografica en Estaus Unius, dende os anyos 1930 y se nacionalizó ciudadana estausunidense en 1939.[1]
Ye considerata una d'as prencipals figuras d'o cine, y estió a musa d'o director cinematografico Josef von Sternberg, con qui treballó en cuantas cintas. Una d'as suyas caracteristicas particulars yera a suya voz, que gosan calificar de sensual; ixo, adhibito a os papels que fació en a primera parte d'a suya carrera cinematografica, fan que sía considerata como un prototipo d'a femme fatale. En 1999 fue esleita por l'American Film Institute como a nueuena millor estrela femenina de toz os tiempos.
Marlene Dietrich yera una personalidat de firmes conviccions politicas, y o suyo antinazismo yera notorio (de feito, compartito con muitos d'os alemans exiliatos d'a Republica de Weimar en plegar a o poder Adolf Hitler y convertir-la en una dictadura, o Tercer Reich). Asinas, se negó a tornar en Alemania poco antis d'escltar a guerra y, en esclatar, estió una artista muit compromesa con a victoria d'os Aliaus. Ixo se manifestó no nomás de parolas, so que tamién en actos: grabó cancions antinazis y antimilitaristas en idioma alemán t'a suya retransmisión, fació actuacions t'as tropas aliatas cuasi a o canto d'o frent de batalla y tenió siempre una firma actitud de refús enta o nazismo y l'antisemitismo. No dixa d'estar ironico que en Judgment at Nuremberg interpretase a la vidua d'un cheneral alemán executato por crímens de guerra.
D'entre a suya filmografía, se puet destacar belunas d'as suyas cintas, como Der blaue Engel (1930, Josef von Sternberg, con Emil Jannings, Kurt Gerron y Rosa Valetti), The Garden of Allah (1936, Richard Boleslawski, con Charles Boyer, Basil Rathbone y C. Aubrey Smith), Angel (1937, Ernst Lubitsch, con Herbert Marshall, Melvyn Douglas y Edward Everett Horton), Witness for the Prosecution (1957, Billy Wilder, con Tyrone Power, Charles Laughton y Elsa Lanchester), u Judgment at Nuremberg (1961, Stanley Kramer, con Spencer Tracy, Burt Lancaster, Richard Widmark, Maximilian Schell, Judy Garland y Montgomery Clift).