![]() |
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Musaranyas (d'o latín <MUS, rato, y <ARANEA, araina, en o sentiu de «ratons-araina») ye o nombre común de diferents especies de mamiferos placentarios chicos que fan parte d'a orden Soricomorpha y a familia Soricidae. Son animals insectivoros y enantes se clasificaban en a desapareixida orden Insectivora. Bella especie de musaranya, como Suncus etruscus, podría estar a especie viva mas chica de mamifero.
Con un aspecto que fa recordar o d'un zorz, as musaranyas se distinguen a la primer gollada por a suya actividat rapeda y nerviosa, por o mueso largo y punchudo y os uellos chicorrons. As musaranyas son animals con un metabolismo a-saber-lo rapedo, o que les fa mirar alimento de forma cuasi perén. Esbulligan muit rapedo, alzando as follas secas con o mueso y uscando tot tipo d'invertebraus que minchar-se.
As musaranyas son estreitament emparentadas con os morganyos, con os cuals comparten familia. Igual que ixes, as musaranyas tienen sustancias verenosas en a saliva, estando entre os pocos mamiferos con vereno verdader, anque o mosigo d'istas ye menos famoso que o d'aquéls. A diferencia d'os morganyos, as orellas d'as musaranyas son grans y se veyen perfectament sobre a cabeza.