Acueductu | |
---|---|
![]() | |
Historia y usu | |
Usu | tresporte d'agua |
Instalaciones | |
Formáu por |
aqueduct bridge (en) ![]() |
![]() |
L'acueductu ye un sistema o conxuntu de sistemes de regación que dexa tresportar agua en forma de fluxu continuo dende un llugar nel que ta accesible na naturaleza, hasta un puntu de consumu distante.
Cualquier asentamientu humanu, por pequeñu que sía, precisa disponer d'un sistema de suministru d'agua que satisfaiga les sos necesidaes vitales. La solución más elemental consiste n'establecer el poblamientu nes proximidaes d'un ríu o prial, dende onde s'acarreta l'agua a los puntos de consumu. Otra solución consiste n'escavar pozos dientro o fuera de la zona habitada o construyir barcales. Pero cuando'l poblamientu algama la categoría d'auténtica ciudá, fáense necesarios sistemes de conducción que llogren l'agua nos puntos más afechos de la redolada y avérenla al llugar onde s'estableció la población.
Inclusive cuando la población taba a veres d'un ríu, la construcción de conducciones yera la meyor forma de garantizar el suministru, en cuenta d'estrayer l'agua del ríu que, anque tuviera mui cerca, xeneralmente tenía un nivel más baxu que'l pobláu. N'otres ocasiones faía l'acueductu porque l'agua yera de meyor calidá que la del ríu. Pa cubrir esta necesidá entamen obres de gran valumbu que puedan asegurar un suministru d'agua.
Anque esistíen precedentes nes civilizaciones antigües del Próximu Oriente y los inxenieros griegos construyeren conducciones eficientes, los inxenieros romanos, gracies fundamentalmente al so usu del formigón, fueron los que punxeron a puntu téuniques que pudieron xeneralizase por toles ciudaes del Mediterraneu. Con tou, los factores téunicos nun fueron los únicos que contribuyeron a espublizar esti tipu d'obres, fixo falta tamién la unidá política del Imperiu y la esistencia d'un sistema económicu fuerte que creara les condiciones pal desarrollu urbanísticu.
La mayor parte del percorríu faíase per canales, polo xeneral cubiertos, que se construyíen peles fasteres de los montes, siguiendo la llinia de pendiente deseada (xeneralmente pequeña, del orde del 0,004%), y asitiábense cada ciertu tiempu caxes d'agua o arques d'agua, pequeños depósitos que sirvíen pa regular el caudal o decantar los sólidos, de normal arena, que les agües pudieren abasnar.
Cuando se debía salvar un camín, a un nivel un pocu más baxu que'l del acueductu, usábense sifones, nos que l'agua pasaba so la torga y volvía xubir al nivel anterior. De cutiu teníen de salvar desniveles más grandes y nellos adoptaben la forma de ponte, yá que faer conducciones en sifón capaces d'aguantar altes presiones yera más caru. Como les pontes son la parte más visible de la obra, quedó la costume de llamar Acueductu a la propia ponte.
En munches ocasiones, estos acueductos siguieron n'usu mientres la Edá Media ya inclusive en tiempos modernos, gracies a arreglos y restauraciones.
Les soluciones aplicaes a los acueductos romanos siguieron usándose ensin cambeos sustanciales hasta'l sieglu XIX. Nel sieglu XX, los progresos na producción de cementos, l'armáu del formigón con aceru, los nuevos materiales y téuniques na construcción de tubos y la posibilidá de construyir potentes estaciones de bombéu revolucionaron les conducciones d'agua y simplificaron la so adautación al terrén.