Beta Pictoris

Beta Pictoris (β Pic) ye una estrella de tipu espectral A5V, asitiada na constelación de Pictor y distante unos 60 años lluz (19.28 pársecs) de la Tierra, con una edá que nun llega a los 20 millones d'años. La so masa ye 1.8 vegaes la masa del Sol y la so temperatura superficial ye de 8500 K. Tien un discu protoplanetariu que afayóse en 1984.

Ye d'especial interés pa los astrónomos por que considérase que ta nesti momentu na mesma fase que travesó'l Sistema Solar nes primeres etapes del so desarrollu. En concretu, atopáronse grandes cantidaes de carbonu gaseoso orbitando alredor de la estrella, lo que lleva a pensar na presencia de planetes alredor de la mesma, ricos en grafitu y metanu, que podríen ser planetes de carbonu), de manera similar a lo que se piensa asocedió nel nuesu sistema. El discu de β Pictoris, detectáu en distintes llonxitúes d'onda con distintos telescopios terrestres y n'órbita (como, por casu, el Telescopiu Espacial Hubble y el Telescopiu espacial Spitzer), amuesa una deformación que puede atribuyise a la presencia d'un planeta en formación.

La estrella AU Microscopii, de tipu espectral M1 y que tamién tien un discu de similares carauterístiques, pertenez al grupu de movimientu común de Beta Pictoris, de lo que se deduz que dambes tienen la mesma edá.

Al igual que Vega y Fomalhaut, Beta Pictoris tamién emite importantes escesos infrarroxos descubiertos pol satélite IRAS, qu'indiquen que tienen discos circumestelares de polvu procesáu. Correspuenden a los prototipos de los discos tipu «debris» o protoplanetarios.