George Walton Lucas, Jr. (14 de mayu de 1944, Modesto) ye'l creador de l'esitosu fenómenu cinematográficu de "Star Wars" y darréu d'Indiana Jones, presidente de Lucasfilm Ltd., LucasARts Entertainment Company, y Lucas Digital Ltd, Lucas Licensing, LucasBooks y Lucas Learning Ltd.
Lucas dirixó la so primer obra cinematográfica THX 1138, en 1970. La película foi producía por American Zoetrope y contó con Francis Ford Coppola como productor executivu. La película taba basada nun curtiumetrax del propiu Lucas ganador de numberosos premios a nivel estatal. En 1971 Lucas forma la so propia compañía, Lucasfilm Ltd, en San Rafael, California.
En 1973 Lucas dirixó American Graffiti, una película sobro coches y xóvenes. Ganó con ella'l Globu d'Oru, el New York Film Critics y el premiu de la National Society of Film Critics. Ganó tamién 5 nomaciones a los Óscars.
Cuatro años dempués, Lucas escribió y dirixó Star Wars (llueu rebautizada como Episode IV: A New Hope), una película que baltió tolos recors de venta d'entradas y ganó siete Óscars de l'Academia. Lucas entamó la historia de Star Wars Episode V: The Empire Strikes Back y Star Wars Episode VI: Return of the Jedi, de les que tamién foi productor executivu. En 1980 escribió y produció Raiders of the Lost Ark, dirixida por Steven Spielberg, algamando 5 premios de l'Academia. Tamién foi co-productor y creador de la historia d'Indiana Jones and the Temple of Doom, estreada en 1984, nomada a 2 premios de l'Academia y algamando un Óscar por efeutos especiales.
L'últimu proyeutu de Lucasfim foi rematar la nueva triloxía de Star Wars. Star Wars Episode I: The Phantom Menace, de la nueva triloxía, foi escrita, dirixida y producida por George Lucas y salió al públicu'l 19 de mayu de 1999. En mayu de 2002 estrenóse la segunda parte, Star Wars Episode II: Attack of the Clones, tamién dirixía y producía por él. El capítulu caberu de la nueva triloxía, Star Wars Episode III: Revenge of the Sith, qu'abre les puertes a la triloxía clásica, estrenóse'l 19 de mayu de 2005, quedando la saga finada.