LSD | |
---|---|
tipo de entidad química (es) ![]() | |
tryptamines (en) ![]() ![]() | |
![]() |
La dietilamida d'ácidu lisérxico, LSD-25 o a cencielles LSD, tamién llamada lisérgida y comúnmente conocida como ácidu, ye una droga sicodélica semisintética que se llogra de la ergolina y de la familia de les triptamines y que produz efeutos psicolóxicos. Los sos efeutos pueden incluyir allucinaciones con güeyos abiertos y zarraos, sinestesia, perceición aburuyada del tiempu y disolución del ego, l'alteración de la perceición, la conciencia y los sentimientos, amás de sentir o visualizar sensaciones o imáxenes que al consumidor pueden paece-y reales pero que nun lo son.
Utilízase principalmente como una droga recreativa illegal, como enteógeno y en dellos países como droga llegal so prescripción médica en sicoterapia.[1] Polo xeneral el LSD inxerse tragándolo o poniéndolo debaxo de la llingua. De cutiu puede consiguise nel mercáu negru en papel secante o en gelatina o tarrones d'azucre, anque tamién puede inyectase.
Anque los ensayos científicos realizaos hasta'l momentu amuesen que'l LSD nun causa adicción,[2] el so consumu puede provocar reaiciones psiquiátriques adverses, dalgunes potencialmente graves, como ansiedá, paranoya y delirios.[3] Nun se conoz con precisión la toxicidá aguda nel ser humanu, pero la dosis letal mediana nes especies pa les que se conoz ye baxa: mures, 50–60 mg/kg i.v., aguarones, 16,5 mg/kg y coneyos 0,3 mg/kg. La causa de la muerte ye'l paralís respiratoriu.[4] De toes formes, ye bien difícil que se produza l'envelenamientu por LSD, porque la dosis necesaria pa producir los sos efeutos sicodélicos ta bien per debaxo de les dosis tóxiques o letales, pos ye abonda con 20 a 30 microgramo pa esperimentalos.[5]
El LSD ye sensible al osíxenu, la lluz ultravioleta y el cloru, anque puede caltenese mientrés años si s'almacena nun sitiu frescu, secu y escuru. La sustancia na so forma pura ye inodora, clara o de color blancu.[6]
El LSD foi sintetizáu per primer vegada por Albert Hofmann en Suiza en 1938 a partir de la ergotamina, un productu químicu que se llogra a partir d'un fungu, el cornezuelo. El nome provién de la denominación que recibió'l compuestu nesi llaboratoriu, un acrónimu del alemán Lyserg-säure-diäthylamid, siguíu d'un nome secuencial: LSD-25.[7] Hofmann afayó les sos propiedaes sicodéliques en 1943, y el LSD foi introducíu polos llaboratorios Sandoz como melecina comercial pa diversos usos psiquiátricos en 1947 so la marca Delysid. Munchos psiquiatres y psicoanalistes de les décades de 1950 y 1960 vieron nella un axente terapéuticu bien prometedor.[8] Na década de 1950, los funcionarios de l'Axencia Central d'Intelixencia d'Estaos Xuníos (CIA) pensaron que la droga podía ser útil pal so usu en programes de control mental y guerra química, polo que la probaron n'estudiantes y mozos militares ensin la conocencia d'estos.[9] L'usu recreativu qu'especialmente los mozos empezaron a dar a la sustancia nos movimientos contraculturales de la década de los 60 bastió la so prohibición;[10] l'usu extramedicinal del fármacu causó una nube política que llevó a la prohibición de la sustancia, ilegalizando tolos sos usos, tanto melecinales como recreativos y espirituales. A pesar d'ello, dellos círculos intelectuales siguieron pensando que'l LSD tenía un gran porvenir como sustancia melecinal y siguieron financiando y promoviendo la so investigación.[11][12] En dellos países aldericóse o propuestu llegalizar el so usu terapéuticu, ente que n'otros, como Suiza, autorizáronse investigaciones pal so usu como melecina.[13][14][15]