Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. Pues añadiles tu mesmu o avisar al autor principal del artículu na so páxina d'alderique pegando: {{subst:Avisu referencies|Nebraska}} ~~~~
La zona estuvo ocupada, demientres miles d'años, por tribus indíxenes como los omaha, missouria, ponca, pawnee, otoe y sioux. De magar la llegada los europeos perteneció a España y Francia, ensin que dengún de los dos países colonizara dafechu'l territoriu; seríen los ingleses, a finales del sieglu XVIII, los que crearan el primer asentamientu, el puestu comercial nomáu Fort Charles. L'exércitu d'Estaos Xuníos llevantó'l so primer fuerte en 1819, y en 1854 creose'l territoriu de Nebraska, qu'habría convertise nel 37ᵘ estáu de la Xunión el 1 de marzu de 1867.
Xeográficamente l'estáu tien dos fasteres de paisaxe estremáu: al oeste tán les Grandes Llanures, d'estepa ensin arboláu, perbona pa la cría estensiva del ganáu; y al este una rexón de perfil onduláu con cumales de pocu altor, nomada Dissected Till Plains, na que s'asitien les mayores ciudaes del estáu, Lincoln y Omaha. Climáticamente hai tamién dos zones nel país. Na metá oriental hai un clima continental húmidu (Dfa na clasificación climática de Köppen), y na occidental un clima semiáridu (BSk). En xeneral hai grandes diferencies de temperatura ente l'iviernu y el branu, con fuertes tormentes y tornados na primavera y el branu y un vientu, nomáu Chinook, que suaviza'l clima nel iviernu y al entamu la primavera.
