One Direction | ||
---|---|---|
![]() | ||
Datos xenerales | ||
Orixe |
Londres, Reinu Xuníu ![]() | |
Información artística | ||
Xéneru(os) | Pop, pop rock y rock | |
Periodu d'actividá | 2010 - anguaño | |
Sellu discográficu | Syco | |
Miembros | ||
Niall Horan Liam Payne Harry Styles Louis Tomlinson | ||
Enllaces esternos | ||
Sitiu web oficial | http://www.onedirectionmusic.com/ | |
Bandcamp | 1direction | |
Discogs | 2432320 | |
onedirectionmusic | ||
onedirection | ||
IMDb | nm4108424 | |
[editar datos en Wikidata] |
One Direction (embrivío davezu como 1D) ye una boy band británica-irlandesa formada en 2010 en Londres, Reinu Xuníu, con motivu del programa The X Factor. Mientres la tresmisión del concursu, el quintetu, compuestu entós daquella por Harry Styles, Liam Payne, Zayn Malik, Niall Horan y Louis Tomlinson, foi apadrináu por Simon Cowell. La so formación diose depués de que los cinco integrantes fixeren les sos audiciones y fueren espulsaos de la competición. Tres esto, Nicole Scherzinger, una de les xueces, suxerió que los cinco formaren parte d'un grupu, al que finalmente llamaron One Direction.[1] El grupu finalmente quedó nel tercer llugar del concursu, pero sicasí, Cowell pagó un contratu discográficu con Syco Music pol que pudieren llanzar un discu.[1][2][3]
Nel segundu semestre del 2011, llanzaron el so primer cenciellu, «What Makes You Beautiful», que llogró debutar nel númberu unu de les principales llistes del Reinu Xuníu ya Irlanda.[4] Poro, recibieron dellos reconocimientos, como un Premiu Brit al meyor cenciellu británicu y trés MTV Video Music Awards al meyor artista nuevu, meyor videu pop y videu más dignu de compartir.[5][6] El so álbum debú, Up All Night, llogró debutar na posición númberu unu del Billboard 200 y convirtió a One Direction nel primer grupu británicu qu'algama'l númberu unu col so primer discu na hestoria de la llista.[7] Pa promocionar Up All Night, One Direction embarcóse nel Up All Night Tour, col que dieron estremaos conciertos n'Europa, Oceanía y América. Nel 2012, el so ésitu caltúvose col llanzamientu de Take Me Home, el so segundu álbum. Al igual que'l so predecesor, debutó nel primer puestu del Billboard 200 y fixo a One Direction el primer grupu masculín y segundu en xeneral que llogra algamar dichu puestu colos sos dos primeros discos, darrera de Danity Kane.[8] Tamién llogró'l númberu unu nel Reinu Xuníu, polo que ye'l so primer discu que lo llogra.[4] El primer cenciellu, «Live While We're Young», tuvo una receición comercial superior a la de «What Makes You Beautiful», yá que s'asitió ente los diez más vendíos na mayoría de les llistes musicales, más concretamente, en Nueva Zelanda convirtióse nel primer númberu unu del quintetu.[9]
Más tarde, en 2013, llanzaron el so tercer álbum Midnight Memories, que se convirtió nel más vendíu d'esi añu, con cuasi cinco millones d'unidaes vendíes.[10] D'esti discu, escoyéronse los cenciellos «Best Song Ever», «Story of My Life», «Midnight Memories» y «You and I», que entraron en delles llistes de tol mundu.[11] La xira correspondiente del discu, Where We Are Tour, convirtióse nuna de les más esitoses de la hestoria, con una recaldación de cuasi 300 millones de dólares y una asistencia de tres millones y mediu de persones.[12] El so cuartu álbum, Four, incluyó los cenciellos «Steal My Girl» y «Night Changes». Anguaño One Direction alcuéntrase promocionando dichu álbum col so On The Road Again Tour. En marzu de 2015, en plena xira, Zayn Malik anunció la so marcha de One Direction, mientres el restu del grupu siguiría alantre cola xira y la grabación del so quintu álbum.[13]