Kawabata Yasunari

Kawabata Yasunari ( 川端 康成 niponavon )

Kawabata Yasunari koe Osaka kobliyir. Gadikye tiyir selaropik, arayik albas va ezlopa is lingera. Bak 1900 kotcakolon ve awalkeyer. Acum Yasunari bliyir do gadikya dana ko neor ke Osaka grilizebliyir. Inya mildume dere di awalkeyer. Yasunari gan gadikyef veygadikeem zo emudeyer. Veygadikye tiyir xof korobamik dan va tayaxo ta boara ko yon leprostewaf ind al lusteyer. Voxen rawanuca di tiyir. Wali tole klaa isu pere, Yasunari kali awalkera ke veygadikya bak 1906 az tela ke berikya bak 1909 soe kalanyon bliyir.

Nekev albara ke veygadikeem, va gracuca ke merosetiken gadikeem soe satoleyer. Va mon 40 afigasuteks ke gadikye digiyir vexe darpe konaka grilizeblira vaon koton di drasuyur. Batinde yona vudesaca isu klok koofis va inaf suteroteem tozuyud.

Anyustdon kaiki awalkera ke veygadikya, jotafi Yasunari do guazapafe wiiskafe veygadikye zavzayar antaf. Vwepanyafi zokevesiki waleon reduweyed. Bak 1914 per-san-alubdafe akolafe veygadikye awalkeyer.

Battandon, va pone Yasunari suteyer. Bate pone ( Shônen ; Sardik ) arti tansanda ( bak 1925 ) zo sanegayar. Va inaf taneaf suterot zo torigir.

Dene ziavikye Yasunari tevaksaton radimion ugalzeyer aze va bemirubaxo ke Ibaragi olda kofiyir. Vanpiyison maxablodik mali 1916, va Kiyono ayikyapaf oyik di goviunsuyur.

Binunon golde niaon torigino alto ise buiveweson da Yasunari tiyir vollistafi, va Kiyono maxagositik korenayar, ton milikrafamafa renara. Radimi divfira ke Yasunari ko Kyoto bak 9^-aksat 1917, wale toloy yik balemdon toz waltwayar. Koe Shônen ( Sardik ) ( 1948 ) bata skeda turowinaweyer. Dere tir dulapafa rabatera da yona doaca, rotisa bak bata blirekola vanmiaon ikrafamuca is listucadjumesuca is krenugafa golera, koe Nemureru bijo ( Kenibesa listikya ) ( 1960 ) ik Mizuumi ( Uzda ) ( 1954 ) ik Yama no oto ( Buura ke meftava ) ( 1949 ) zo rotrasid.

Voxen bat berpot poke yona inafa bagala soe leon zavzad kapbure inafa blira dam Izu no odoriko ( Stutesikya ke Izu ) ( 1926 ). Bat greelt ke blira ke Kawabata va koyara ko Yugashima bak 1918 vadjer. Bam tison 19^-daf, koe noldakirafa xuta ini va cuisafa stutesikya ve kazokeveyer. Icde Yukiguni ( Nolda Vo ) ( 1935 ) batcoba dere askir da trakur.

Bak 1919, tolsandaf, ini va nuyapaf is naf suterotaf rijay pasur. Koe cavulidebaxo bewik va sint kazokeved. Va Hatsuyo rungrupeyer. Battel, koe yona inafa nega kan Michiko yoltayan, tiyir jotafa zanisikya dulapemena gan in. Neken ulidebaxo moimon xaayar, acum ko dopewa koe Gifu koe meftaveem iste Nipona ta irubara do vanikatcus gadikeem inya ve mallapiyir. Nekevon, Yasunari va ino wan nobayar aze gorayar da di kureyer. Inaf nikeem, givayanon, va egara va kurera tcokeyed. Arti aksat, ino va merogrupena kurerajoasa twa pu in stakseyer. Batcoba en zo gobelir koe Nanpô no hi ( Geuf tey ) ( 1923 ).

Arti tolda geltrafa suterotafa klepa ke Kawabata bokaweyer. Ini grupeyer da va Hatsuyo mea di tolwiyir, wori ko inaf negeem battelya di koingayar. Ta ino kaatoeson va rietavikya, mo jontika koredikya blisisa va yon inaf suterot, izga di aykaweyer. Wori arti alubda ini arinde kureyer. Vexe damo mana kurera, tira ke Hatsuyo va ini veber. Arti santolda, beka bata bifa gan konaktan zo torigir dum sordafa kore tir koe Fubo e no tegami ( Yona twa pu gadikeem ) ( 1932 ), ini va ino di tolwiyir volse di zo awuzayar.

Inafa lovafa gesta drigdasa va kotunuca ke Hatsuyo bam zo ikapiyir gan gribidganesida ugale ini va int di kobibeyer. Luxe ayikyafa ewava suna koe negeem, daletoe me tir tela ke Hatsuyo, joayana gan geltruca, vexe gundaf rietaks kolnan moe inaf ilkaf tacokeem.

Tozi 30 sanda kle tir da va tenafa bliremtrakura zomer : va nyasesa is mekramafa remtrakura, va gestafa tamava lize vanmia inaf kivakseem sordafa listuca aotcewer.

Bak 1968 inaf suteroteem gu Nobel suterotafo poradro zo gableyer. Taneaf niponaf suterotik kazawayas va mana eresklaca. Ba 16/04/1972 koe Zushi poke Yokosuka, Yasunari Kawabata kseyer.