Kunststoff

Unta Kunststoff, Plastik oda Plaste vastähd ma organische, polymere Festkeapa, oiso feste Materioin, de wo syhthetisch oda hoibsynthetisch aus monomern organischn Molekuin oda Biopolymern heagstejd wean. De longa Molekuikettn aus dena Plastik afbaud wead, bstenga aus ana Onanondareihung vo monomern Grundbaustoana. Es miassn owa ned imma de gleichn Monomere sei. Ma untascheidt do zwischn drei groußn Gruppn vo Kunststoffn:

• Duroplaste,
• Elastomere und
• Thermoplaste.

As Bsondare bei de Kunststoffe is, doss gonz vui Vaschiedne gibt, de wo in eanare chemischn und physikalischn Eingschoftn recht vaschiedn sei kenna. Des liegt am Afbau vo de longa Molekuikettn, zum Beispui on da Läng, wiavui Vazweigunga in da Kettn doss gem duad und freili aa ón de Monomere de heagnumma worn san. Aussadem ko ma de Eingschoftn vo Kunststoffe no mid Zuasotzstoffe vaändan, zum Beispui Foabn, Gleitmiddl oda Woachmocha.

Aus Kunststoff wean Foamtei, Hoibzeig, Fosan oda Folien gmocht. Heagnumma wean Kunststoffe zum Eipackln, fia Oiziagsachan, zum Isolian geng Weam oda Strom, Real, Bodnbeläg, in Lack, Kleba oda in kosmetische Sochn, in da Luft- und Raumfoaht, fia Gehaise, beim Auto ois Roafa, Boista, vui Vakleidunga, Karossarietei und no vui meahra.

A synthetischa Kunststoff wead duach Polymerisation aus Monomere heagstejd. Meistns san de Rohstoff kuaze Koinwossastoffkettn de wo ma in a Eadöjraffinerie duach sognennts Crackn vo längare Kettn heastejd. Hoibsynthetische Kunststoff san aus in da Natua voakemmande Monomere afbaut, de wo nua a bissl vaändat wean.