Rhwng Gwy a Hafren oedd yr enw am ranbarth rhwng afonydd Gwy a Hafren yn yr Oesoedd Canol Cynnar.
Roedd yn cynnwys sawl cantref a chwmwd, gan gynnwys Buellt, Cwmwd Deuddwr, Elfael, Gwerthrynion, a Maelienydd. Ymddengys fod Rhwng Gwy a Hafren yn dalaith o'r Bowys gynnar, ond ni wyddys ddim o gwbl am ei hanes. Yn ddiweddarach daeth rhannau o'r diriogaeth yn rhan o deyrnas Brycheiniog.
Mae un traddodiad yn honni bod Cawrdaf, mab Caradog Freichfras, wedi sefydlu teyrnas yno yn y 6ed ganrif, ond diweddar a niwlog yw'r cyfeiriad ac ni ellir dibynnu arno.