C'l artìcul chè 'l è scrit in
Miranduléś |
![]() | ||
Giovane e innocente | ||
![]() La Nova Pilbeam in na figùra dal film | ||
Śōv'n e inusènt 1937 | ||
---|---|---|
Regìa: Alfred Hitchcock | ||
Scritōr: Josephine Tey Charles Bennett • Edwin Greenwood Anthony Armstrong • Gerald Savory | ||
Atōr: Nova Pilbeam • Derrick De Marney Percy Marmont • Edward Rigby • Mary Clare John Longden • Basil Radford • Pamela Carme | ||
Müsica: Jack Beaver • Louis Levy | ||
Léngua: Ingléś • Latìn | ||
Dürä dal film: 80 minüt | ||
Nasiōṅ: Régn Unî |
Giovane e innocente (Śōv'n e inusènt) 'l è 'n thriller britànic dal 1937 'd Alfred Hitchcock.
La Christine Clay (Pamela Carme) l'è n'atōra ingléśa 'd sucès mo la gh'à anc un marè dimóndi gelóś, Guy (George Curzon). In na nòt ad timpèsta, lung al mâr, i dū i s quistiònan e la dóna la gh mòla 'n sćiafòṅ in ghigna in du a s véd ch'al gh'à 'n tic narvōś ch'l al custrìnś a srar e a vèrar i òć ad cuntìnuv.
La matìna dòp un tisi ciamâ Robert Tisdall (Derrick De Marney) al fà a mènt ch'in dl'àqua a gh'è 'l cadàvar dna dóna, qvél dla Christine, strusàda cun la sintùra dal sò impermeàbil che qualchidòṅ al gh'iva fargâ la sira prima in un lucàł ciamâ „Al capèl dal prevòstar“. La pulisìa la riva e la taca a 'vēr di suspèt su 'd lò anc parchè i dū i s éran cgnusû tri an prima in Amèrica. 'L óm al finìs acsè in parśòṅ. In sò ajùt la gh s mét la fiōla dal culunèl Burgoyne (Percy Marmont), l’Erica (Nova Pilbeam), ch'la gh dà 'n pasàǵ in màchina durànt la sò scapàda da 'l tribunàł, cardénd-al inusènt dabòṅ.
'L óm al s lóga in un mulèṅ bandunâ, cun l’Erica ch'la gh pòrta da magnàr ad nascòst. In séguit la ragàsa la vîṅ a savēr ch'a gh'è 'n barbòṅ dal pòst, Will (Edward Rigby), ch'l à spianâ 'n impermeàbil nóṿ.