C'l artìcul chè 'l è scrit in
Miranduléś |
La Marion Bartoli (Le Puy-en-Velay, 2 'd Utóbar dal 1984, a s lèś [maʁjɔ̃ baʁtɔli] in Francéś) l'è stada na tenìsta francéśa prufesiunìsta da 'l Favràr dal 2000 a 'l Agóst dal 2013 ch'l'è stada la nùmar sèt dal mónd in singulàr (al 10 ad Śnar dal 2012). L'è élta 170 cm e la péśa 63 chilo.
La dróa al bras dèstar e la tira drit e arvèrs a dū maṅ. In bisàca la s è misa òt turnèo dla WTA e siē ad qvéi d'l ITF.
L'è na fan sfegatàda dla squàdra ad balòṅ d'l Olimpique Marsìglia e la viṿ in Śvisra. Sò pàdar 'l è 'n dutōr, sò màdar n'infarméra. A gh piàś pituràr e magnàr al tórti ad póm ch'la gh fà sò màdar.
In dal sircùit l'è cgnusùda par la śmagna ch'la s pòrta adrē durànt i punt, tant ch'a pâr ch'la gh'àppia sèmp'r al diav'l adòs quànd la próa da par lē i cólp par dar-as la carga, e par la sò manéra machinóśa ad tiràr al servìsi, in dua la piga ad cuntìnuv i sò śnòć sù e śò faghénd in cal méntar strabalśàr la bucìna par tèra.
In dla sò caréra l'è stada bòna ad bàtar dimóndi vòlti dal śugadōri a 'l top cuma la Venus Williams e sò surèla Serena, l'Ana Ivanović, la Lindsay Davenport, l'Arantxa Sánchez Vicario, la Dinara Safina, la Caroline Wozniacki, la Petra Kvitová, la Samantha Stosur, la Viktoryja Azaranka, la Justine Henin e la Kim Clijsters.
In di turnèo dal Gran Slam l'à śugâ dū finàli a Wimbledon, pardénd in dal 2007 cóntar la Venus Williams (dòp avér més in riga la Justine Henin) e vinsénd in dal 2013 cun la Sabine Lisicki. Inóltar l'è stada bòna ad rivàr in semifinàl a 'l Roland Garros par pò èsar batùda par la Francesca Schiavone in dal 2011. A gl'Australian Open e a gl'US Open incéci la n è mai andàda da 'd là di quàrt.
La francéśa la vins al sò prim turnèo al 7 ad Śnar dal 2006 in sal cimènt quànd la bat la Vera Zvonarëva 6-2 6-2 in dla finàla 'd Auckland. In Utóbar l'ardópia purtànd'-s a cà al tìtul ad Tokyo cóntar la Aiko Nakamura tulénd-as acsè l'arvìnsida dla finàla pardùda a Praga cun l'atra giapunéśa Akiko Morigami 'l an prima.
In dal 2009 e in dal 2011 la vins àtar quàtar turnèo (dū p'r an) baténd via via la Na Li a Monterrey, la Venus Williams a Stanford, la Petra Kvitová a Eastbourne e la Samantha Stosur a Uśàka. L'arév anc psû métar-'s in bisàca dimóndi da piò ma in dū caś l'è stada custréta a mulàr lè dū finàli par di infurtùni: a Bali cóntar la Aravane Rezaï e a Straśbûrg cóntar la tedésca Andrea Petković.
La taca al 2012 pardénd in di quàrt 5-7 4-6 da la Viktoryja Azaranka a Sydney. Al 12 ad Favràr dal 2012 la vèṅ batùda par l'Angelique Kerber in dla finàla dal turnèo ad cà ad Parì (in sal cimènt a 'l quèrt) par 7-6 5-7 6-3 dòp ch'l'iva fat fóra la Petra Martić, la Roberta Vinci e la Klára Zakopalová. A Doha l'è custréta a dar-'g a muć in semifinàl cóntar la Samantha Stosur. In di Stat Unî la pòrta a cà i quàrt a Indian Wells (3-6 4-6 da l'Ana Ivanović) e la semifinàl a Miami (4-6 2-6 da l'Agnieszka Radwańska dòp c'l'iva dâ la paga a la Simona Halep, a la Marija Kirilenko e a la Viktoryja Azaranka in di tùran precedènt). La và invéci dimóndi mâl la stagiòṅ in sla tèra batùda parchè la và sèmpar fóra in di prim tùran. A Eastbourne la pèrd in semifinàl da la Tamira Paszek, a Carlsbad la pèrd la finàl cun la Dominika Cibulková 1-6 5-7. In Agóst a New Haven la bat la Laura Robson e la Sloane Stephens ma pò la céd a la Sara Errani in di quàrt, acsè cuma a Tokyo. A gl'US Open l'è bòna ad bàtar la Petra Kvitová in tri sét ma pò la patìs al stés tratamènt da la Marija Šarapova in di quàrt. La finìs 'l an cun la semifinàl a Pechîn (4-6 2-6 da la Viktoryja Azaranka) e pardénd subìt a Mósca par 3-6 0-6 da la Sofia Arvidsson.
In dal 2013 la và fóra a 'l tèrs tùran di Australian Open pardénd da l'Ekaterina Makarova par 7-6 3-6 4-6. A Parì invéci l'è la Mona Barthel a mandàr-la a cà in di quàrt. A Indian Wells la bat la Chanelle Scheepers e la Svetlana Kuznecova prima ad pèrdar da la Sara Errani 3-6 2-6. A Miami e a Monterrey la và fóra subìt sóta i cólp dl'Andrea Petković e dla Coco Vandeweghe. In Maǵ la Makarova la gh dà śò incóra a 'l péni a 'l tèrs tùran ad Madrid, pò da tèsta ad série nùmar òṅ la vèṅ sćiancàda a 'l prim tùran a Straśbûrg da la Camila Giorgi par 3-6 2-6. A 'l Roland Garros la vèṅ spasàda via da la Francesca Schiavone a 'l tèrs tùran par 2-6 1-6. A Eastbourne la n śōga mia la sò partìda dal secónd tùran cun la Na Li par n'infesiòṅ ma a Wimbledon l'è bòna ad śugàr. In di prim tùran la bat l'Elina Svitolina 6-3 7-5 e la Christina McHale 7-5 6-4. A 'l tèrs tùran la dà vita a na partìda tiràda cun la Camila Giorgi, finìda 6-4 7-5, cun la tenìsta ad Maceràta ch'l'éra avànti 4-3 e servìsi in dal secónd sét prima ch'la partìda la fus farmàda par la piòva. In di utàṿ la còrsa la fà fóra n'atra itagliàna, la Karin Knapp, par 6-2 6-3 e pò 'l è 'l tùran dla Sloane Stephens ad far al valìś pardénd 4-6 5-7. In semifinàl la francéśa la sćiànca la Kirsten Flipkens par 6-1 6-2 prima ad psér alvàr al piàt ad Wimbledon a 'l secónd tintatìṿ, dand un 6-1 6-4 a la Sabine Lisicki. La còrsa, a n esénd minga tant in bóla, la salta tut al méś ad Luj par pò turnàr a śugàr a Turònt in Agóst. Dòp avér pasâ al prim tùran p'r un bye, la Marion la riva in di utàṿ baténd la Lauren Davis par 6-0 6-3 ma pò l'è custréta a dar-ag sù cun la Magdaléna Rybáriková in sal puntéǵ ad 6-7 0-1 parchè al mâl ch'la gh'iva 'l éra turnâ fóra. A Cincinnati la nutìsia ch'la śēla tut: la Bartoli la fà savér che qvéla cun la Simona Halep, pardùda par 3-6 6-4 6-1, l'è stada la sò ultma pardìda parchè al sò fìśic stlâ al n in pōl piò.
Turnéo | An | Vins/Pardû | Aversàri in finàl | Puntéǵ |
---|---|---|---|---|
Wimbledon | 2007 | P | Venus Williams | 4-6 1-6 |
Wimbledon | 2013 | V | Sabine Lisicki | 6-1 6-4 |