C'l artìcul chè 'l è scrit in
Miranduléś |
Michael Igor Peschkowsky, cgnusû méj cuma Mike Nichols (Berlîṅ, 6 ad Nuvémbar dal 1931 - New York, 19 ad Nuvémbar dal 2014), 'l è stâ 'n regìsta americàṅ vinsidōr 'd al Prèmi Òscar dal 1968 p'r al film Il laureato.
Fiōl 'd un studiōś rus cun di urìgini ebrèi, Nichols da pìcul 'l è custrét a scapàr via da la Germâgna in dal 1939 quànd Adolf Hitler al dà vita a 'l léǵ rasìsta. La sò famìja la s stablìs a Chicago ma in dal 1943 sò pàd'r al mōr in guèra. Mike al s inśégna a far incòsa pò al và a studiàr a 'l Actor's Studio a New York. In di an Sinquànta al lavóra cun l'Elaine May a Broadway.
A trénta-sinc an in dal 1966 al gira 'l sò prim film, Chi ha paura di Virginia Woolf? (Chi gh'à paùra dla Virginia Woolf?), cun prutagunìsta l'Elizabeth Taylor. C'n al secónd film, Il laureato (Al laureâ), al vins al Prèmi Òscar e la sò caréra e qvéla ad Dustin Hoffman i ciàp'n al vōl.
Cun Jack Nicholson al gira tri film: Conoscenza carnale (Cgnusénsa carnàla, 1971), Due uomini e una dote (Dū óm e na dòta, 1974) e Wolf - La belva è fuori (Lóv - La bistiàsa l'è fóra, 1994). Al lavóra anc cun la Meryl Streep in Silkwood dal 1984 e in Cartoline dall'inferno (Cartulìni da 'l Infèran) dal 1990, cun Harrison Ford in A proposito di Henry (A prupòśit 'd Henry, 1991) e cun Robin Williams in Piume di struzzo (Lumi ad strus, 1996) arfacimènt dal film Il vizietto.
Fra i sò ùltim film, I colori della vittoria (I culōr dla vìnsida, 1988) e Closer.