Artistnomo

Artistnomo (artistonomo) estas kromnomo de fama persono. Artistnomon ofte uzas varieteaj kaj cirkaj artistoj, kantistoj kaj aliaj muzikistoj, aktoroj, iluziistoj, verkistoj de bildstrioj kaj malpli kutime ankaŭ sportistoj, ekzemple brazilaj futbalistoj.

Artistnomo tipe estas pli simpla kaj eleganta ol la oficiala nomo de la persono. Artistnomo ankaŭ servas por distingi la publikan vivon de artisto disde la privata. Funkcion similan al artistnomo havas la batalnomoj kiujn uzas certaj politikistoj kaj ankaŭ boksistoj.

Artistnomo distingiĝas de pseŭdonimo (kaŝnomo) en tio, ke ĝi ne estas intencita por anonimigi la portanton sed, male, por konatigi ĝin. Aliflanke, ĝi distingiĝas de karesnomo aŭ petolnomo en tio, ke ĝi uziĝas en pli oficiala maniero.