Edward Estlin Cummings (Cambridge, Massachusetts, 1894ko urriaren 14a - North Conway, New Hampshire, 1962ko irailaren 3a) Estatu Batuetako olerkaria izan zen, sarritan E.E. Cummings izenaz ezaguna. Ralph Waldo Emersonek sortutako tradizio erromantikoaren jarraitzailea izan zen. Tipografiazko baliabide ugari erabili zuen bere olerkietan. 1922an, The Enormous Room eleberria eman zuen argitara. Lan horretan, Lehen Mundu Gerran (1917-1918) etsaiarekin harremanak izan ote zituenaren salaketapean preso eman zuten garaiko gertakizunak kontatzen ditu. Cummingsen poesia (Poems 1923-1954, 1954an; Complete Poems, hil ondoko liburua, 1968an) Estatu Batuetako abangoardiaren gustukoa zen. Ezra Pounden adiskidea izan zen. Pinturan eta marrazkigintzan ere aritu izan zen. Egunerokotasunaren eta agintearen aurkakoa zen, eta satira eta kaleko hizkuntza erabili zituen horien kontra, eta elkarren arteko maitasuna aldarrikatzeko. 1931. urtean, Sobietar Batasunera eginiko bidaiaren berri ematen duen Eime izeneko kontakizuna idatzi zuen (1933).