ETAk hildakoak

ETAk hildakoek 1968z geroztik euskal erakunde armatuaren eraso baten ondorioz galdu zuten bizitza, eta 2010ean izan zuen azken hildako biktima. Datu desberdinak eman izan dira kopuruez, baina ofizialki 829 hildako onartu dira. 2021eko otsailean, Emilio Lopez Adan Beltza idazle eta etakide ohiaren ikerketa zabalak 843 hildako identifikatu zituen euskal talde armatu klandestinoek eraginda.

Sailkapen eta zehaztasunari begira, terminologia zuhurtziaz irakurri behar da, Espainiako hedabideek ETAri egozten baitiote ETAtik gerora sortu ziren talde guztien eta, are, identifikatu gabeko atentatuei. ETAk hildako lehen pertsona José Pardines guardia zibila izan zen, errepide kontrol batean topo egitean, 1968ko ekainaren 7an. Aurrez antolatutako ekintza armatu batean hildako lehenengoa, berriz, polizia politiko frankistaren Donostiako buru Melitón Manzanas izan zen, torturatzaile ezaguna. Geroztik, garrantzi eta izen handiko hainbat pertsona hil zituen, eta biktima bihurtu baino lehen erabat ezezagunak ziren pertsonak ere bai, besteak beste:

• Luis Carrero Blanco (1973ko abenduaren 20a), Espainiako gobernuko presidentea.
• Javier Ybarra (1977ko ekainaren 2a), Bilboko enpresaburua.
• José María Ryan (1981eko otsailaren 6a), Lemoizko zentral nuklearra eraikitzeko lanetako ingeniari burua.
• Dolores Gonzalez Katarain Yoyes (1986ko irailaren 10a), ETAko zuzendaritzako kide ohia.
• Gregorio Ordoñez (1995eko urtarrilaren 23a), Donostiako zinegotzia.
• Francisco Tomás y Valiente (1996ko otsailaren 14a), legelaria, unibertsitateko irakaslea, Espainiako Konstituzio Auzitegiko lehendakari izana.
• Miguel Angel Blanco (1997ko uztailaren 13a), Ermuko (Bizkaia) zinegotzia.
• Fernando Buesa (2000ko otsailaren 22a), Euskal Autonomia Erkidegoko parlamentari eta sailburu ohia.
• Joxe Mari Korta (2000ko abuztuaren 8a), enpresaburua, ADEGI Gipuzkoako Enpresaburuen Elkarteko presidentea.
• Ernest Lluch (2000ko azaroaren 21a), Espainiako parlamentari eta ministro ohia.
• Inaxio Uria (2008ko abenduaren 3a), Azpeitiko (Gipuzkoa) enpresaburua.

ETAk hil zituen, Espainiako historia osoan, Espainiako Armadako goi agintari gehien; inongo gudan ez dira hainbeste hil, ezta Espainiako Gerra Zibilean ere.

1. ↑ «Últimas víctimas mortales de ETA: Cuadros estadísticos», Espainiako Barne Arazoetako Ministerioa. Web orria bisitatu den data: 2011-10-23.