Espektrometro edo espektrografoa erradiazio baten espektroa aztertzeko tresna da. Argia aztertzeko tresna garrantzitsuenetakoa da. Haren bidez, argi-iturri batek igorritako argiaren uhin-luzerak eta maiztasunak neur daitezke, partikulen energia edo masa neurtu, errefrakzio-indizeak mugatu, eta difrakzio-, polarizazio- eta interferentzia-efektuak aztertu. Espektrometroaren bidez erradiazio elektromagnetikoek materian duten eragina ere aztertzen da. Hala, molekula organiko batean dauden funtzio-taldeak ezagut daitezke, konposatu baten analisi kuantitatiboa egin, molekula-loturak aztertu, etab.