Midwayko gudua Bigarren Mundu Gerran, japoniar eta estatubatuar armadek borrokatutako guda garrantzitsu bat izan zen, 1942ko ekainaren 4tik 7ra. Izena Midway Atoloitik datorkio. Japoniar gudarosteak galdu zuen lehena izan zen, lau hegazkin-ontzi hondoratuta: Akagi, Kaga, Hiryu eta Soryu. Estatubatuarrek, ordea, Yorktown hegazkin-ontzia soilik galdu zuten. Guda erabakigarri hartatik aurrera, japoniarrek itsasoan zuten nagusitasuna betiko galdu zuten: haien konkistak eten egin ziren eta AEBek, aldiz, Japoniar Inperioaren aurka egiten zituzten erasoaldiek gero eta indar handiagoa izan zuten.
