Palestinar Lurralde Okupatuak[1] Zisjordania eta Gazako zerrendak osaturiko eskualdea da. 1948 arte, eskualde hori Palestinako Britainiar Mandatuan zegoen, eta Jordania eta Egiptok (1948) eta Israelek (1967) konkistatua izan zen. 1993an Osloko itunei esker Palestinar Aginte Nazionala sortu zen. Israel da Palestinar Lurralde Okupatuen gaineko subiranotasuna duen potentzia okupatzailea.
Israelgo Gobernuak errepresio politika gogorra egiten du Palestinar Lurralde Okupatuetan. Ekialdeko Jerusalemen eta Zisjordaniako gainerako lurretan etxeak eraikitzeko, palestinarrek israeldar agintarien baimena eskatu behar dute, baina palestinarren baimen eskaera horien % 94ri ezezkoa ematen diete Israelgo agintariek. Israelen jokamoldea da palestinarren etxeak, oinarrizko azpiegiturak eta sostengu iturriak eraistea. Nazio Batuen Erakundeak kalkulatu duenez, Lurralde Okupatuetako palestinarren etxeen % 28 – % 46 bitarte daude eraitsiak izateko arriskuan.
2016. eta 2017. urteetan, 1.628tik gora palestinar beren etxeetatik kanporatu zituen: horietatik % 38 errefuxiatuak ziren; eta erdiak baino gehiago, haurrak. Erasandako haur askok nozitzen dituzte trauma ondoko estresa, depresioa eta antsietatea. Ekialde Hurbileko Palestinar Iheslariei Laguntzeko Nazio Batuen Agentziak (UNRWA) salatu duenez, behartutako lekualdatze hori nazioarteko legearen urratze larria da.[2]
2023ko urrian, Israel-Palestina gerra hasi zen, eta Israelek Gazako inbasioari ekin zion tankez eta aire erasoz, helburutzat hartuz Hamas erakundea desagerraraztea. Israeldar inbaditzaileek inoiz ez bezalako lurraldearen suntsipena eta heriotza kopurua eragin zuten, gutxienez 39.000 palestinar erailez. Zisjordanian, kolonoek eta Israelgo unitate militarrek askotariko erasoak egin zituzten palestinarren kontra. Eragile politiko eta humanitario ugarik genozidiotzat hartu dute 2024 arte luzatu den Israelen eskalada politiko-militar hori.