Cabalo de Przewalski

Cabalo de Przewalski
Cabalo de Przewalski no Parque Nacional Khustain Nuruu
Estado de conservación
En perigo[1]
Clasificación científica
Reino: Animalia Filo: Chordata Clase: Mammalia Orde: Perissodactyla Familia: Equidae Xénero: Equus Subxénero: 'E. (Equus)' Especie: 'E. ferus' Subespecie: E. f. przewalskii
Nome trinomial
Equus ferus przewalskii (L. S. Poliakov, 1881)
Distribución do cabalo de Przewalski (reintroducido)
Sinonimia
hagenbecki Matschie, 1903 prjevalskii Ewart, 1903 typicus Hilzheimer, 1909

O cabalo de Przewalski (Equus ferus przewalskii), tamén coñecido como cabalo salvaxe mongol (en mongol takhi), é unha rara e ameazada subespecie de cabalo salvaxe (Equus ferus) nativo das estepas de Asia central, especificamente de Mongolia. Chegou a considerarse extinto en liberdade (en Mongolia, o derradeiro cabalo de Przewalski fora visto en 1966), pero foi reintroducido satisfactoriamente no seu hábitat de Mongolia no Parque Nacional Khustain Nuruu, e nas Reservas da Naturezas Takhin Tal e Khomiin Tal. A súa clasificación está aínda en debate, e algúns taxonomistas considérano como unha especie de seu, Equus przewalskii.

Os nomes comúns deste equino son cabalo salvaxe asiático, cabalo salvaxe de Przewalski, cabalo salvaxe mongol e tahki. Outros nomes históricos pero obsoletos son tarpán verdadeiro e tarpán mongol. O cabalo leva o nome do xeógrafo e explorador ruso Nikolai Przhevalsky.

Moitos dos considerados cabalos "salvaxes", como o Mustang americano ou o Brumby australiano, son en realidade cabalos silvestres que descenden de animais domesticados que se adaptaron a vivir en liberdade. Pola contra, o cabalo de Przewalski xamais foi domesticado e é o único cabalo salvaxe hoxe en día. É unha das tres subespecies coñecidas de Equus ferus, sendo as outras dúas o cabalo doméstico, Equus caballus e o extinto tarpán (Equus ferus ferus). O cabalo de Przewalski está considerado como o parente máis achegado que aínda existe do cabalo doméstico. Tamén hai outros equinos salvaxes como as tres especies de cebra, varias subespecies de asno salvaxe africano, o onagro e o kiang.

1. ↑ Boyd, L. & King, S. R. B. (2011). "Equus ferus ssp. przewalskii". Lista Vermella de especies ameazadas. Versión 2011.2 (en inglés). Unión Internacional para a Conservación da Natureza. Consultado o 24 de xuño de 2012.