Montreal Canadiens

Canadiens de Montréal Montreal Canadiens
Fundación	4 de decembro de 1909 (114 anos)
Cidade	Montreal, Quebec Canadá
Estadio	Centre Bell (21.273 espectadores)
Liga	National Hockey League
Conferencia	Leste
División	Atlantic
Campionatos	24
Propietario(s)	Familia Molson (propietario maioritario) Geoff Molson, presidente
Director	Marc Bergevin
Adestrador	Michel Therrien
Afiliado(s)	St. John's Icecaps (AHL) Brampton Beast (ECHL)
Cores	Vermello, azul, branco
Na rede
http://canadiens.nhl.com/

O Canadiens de Montréal (en francés) ou Montreal Canadiens (en inglés) é un equipo profesional canadense de hóckey sobre xeo da cidade de Montreal (Quebec) que compite na National Hockey League (NHL), estando encadrado na Atlantic Division da Conferencia Leste. O nome oficial do club é le Club de hockey Canadien.^[1] Entre os alcumes do equipo en francés están Les Canadiens (ou Le Canadien), Le Bleu-Blanc-Rouge, La Sainte-Flanelle,^[2] Le Tricolore, Les Glorieux (ou Nos Glorieux), Les Habitants, Le CH e Le Grand Club. O principal alcume do equipo en inglés é Habs, unha abreviatura de "Les Habitants".

Fundados en 1909, os Canadiens son o equipo máis antigo de toda a competición e o equipo profesional de hóckey sobre xeo que leva funcionando dende hai máis tempo, e o único equipo da NHL que xa existía antes da fundación da liga. Entre 1909 e 1917 competiu na NHA, e a partir de 1917 comezou a súa andaina na LNH. Son unha das franquías deportivas profesionais norteamericanas máis antigas, sendo a súa historia anterior á de calquera outra franquía canadense con excepción das do fútbol canadense, así como á de calquera franquía estadounidense agás as do béisbol e os Arizona Cardinals da National Football League (NFL). A franquía é un dos equipos denominados "Original Six", o nome que reciben os equipos que competiron na NHL dende 1942 ata a expansión de 1967.

Con 24 títulos é o equipo máis laureado da NHL, moi lonxe dos Toronto Maple Leafs que son o segundo equipo con máis títulos, cun total de 13. O campionato conseguido na tempada 1992-93 foi a última vez que un equipo canadense gañou a Stanley Cup.^[3]

1. ↑ Club de hockey Canadien, Inc. (2013). canadiens.nhl.com, ed. "Montreal Canadians: Privacy Policy" (en inglés). Consultado o 13 de maio de 2015. 
2. ↑ Hamilton, Graeme (2008-10-22). The National Post Company, ed. "Are the Canadiens a religion?". National Post (en inglés). Canadá. Arquivado dende o orixinal o 24 de outubro de 2008. Consultado o 13 de maio de 2015. 
3. ↑ The Globe and Mail, ed. (12 de xuño de 2011). "It's been 18 years since last Canadian Stanley Cup" (en inglés). Consultado o 13 de maio de 2015.