Kral

Tutón zapisk so ze zastojnstwom krala zaběra. Za swójbne mjeno hlej Kral (mjeno).

Kral (abo kralowna) je pomjenowanje najwyšeho monarchiskeho dostojnika w suwerenym kralestwje. Nad kralom steji jenož hišće kejžor, jedna-li so wo kralestwo we wobłuku kejžorstwa. W Europje pózdnjeho srjedźowěka a zažneho nowowěka – do załoženja modernych republikow – bě kral zwjetša najwyši suweren swojeho kraja: hłowa knježerstwa (eksekutiwa), najwyši sudnik (judikatiwa), zakonjedawar (legislatiwa) a zwjetša tež wjeršny rozkazowar wójska w jednej wosobje. K tomu běše w někotrych statach, kaž na přikład w Jendźelskej, tež duchowna hłowa kraja. Swoju móc dósta po sebjezrozumjenju bjezposrědnje wot Boha.

W načasnych europskich monarchijach je kral zwjetša reprezentatiwny hłowa stata z ceremonielnymi nadawkami, mjeztym zo leži politiska móc pola parlamenta.

Kral abo kralowna zarěči so z „majestota“.