Chacos

Chacos
instantia de: board game[*], type of sport[*], two-player game[*], game-based sport[*]
subclasse de: sequential game[*], mind sport[*], individual sport[*]
Commons: Chess

Chacos^[1] o scaccos (del provencial: escacs, per le latino vulgar: scācchi, ex le persa: šah, le rege)^[2] es un joco de strategia de tabula multo vetere, consistente de duo jocatores que ha cata uno le mesme collection de pecias de duo colores differente, normalmente blanc e nigre. Cata jocator ha dece-sex pecias, a saper un rege, un dama (o regina), duo turres, duo episcopos, duo cavallos e octo pedones. Le chacos es jocate sur un tabula, appellate chachiero o scacchiera, dividite in 64 quadratos dicte casas o casellas (8 x 8), alternativemente clar e obscur como le pecias. Le objectivo del joco es esser le primo que attacca le rege del adversario, de maniera que illo non pote escappar, le chaco mat o scacco mat (del ancian francese: eschec mat, per le arabe: šāh māta, ex le persa: šâh mât, le rege es stupefacte). Un partita pote esser declarate nulle quando le jocatores va in stallo e non pote complir altere actiones.

Le chacos origina del antique joco indian chaturanga. Illo es probabilemente affin al jocos est-asiatic xiangqi (chacos chinese), janggi (chacos corean) e shogi (chacos japonese). Illo veniva a Europa via Persia e le civilisationes arabo-amasic nord-african. Le regulas actual se consolida in le seculo XV in Espania, e le regulamento canonic esseva codificate in le seculo XIX. Le chacos hodie es regulate per le Fédération Internationale des Échecs^[3], con sede apud Lausanna, in Suissa.

1. ↑ pronuncia: /ˈʃakos/, shacos
2. ↑ Derivation: Entitates: 1. (it) Scacchi || 2. (es) Ajedrez || (pt) Xadrez || 3. (fr) Échecs || 4. (en) Chess || Controlo: (de) Schach || (ru) Шахматы || - (Extra): (la) Scacci
3. ↑ officialmente in francese: FIDE - Fédération Internationale des Échecs