Thomas Jefferson (Shadwell, Virginia, America Britannic le 13 de april 1743 – Charlottesville, Virginia, SUA le 4 de julio 1826) esseva un del Patres Fundator del Statos Unite e le tertie presidente del Statos Unite de America.
Jefferson esseva le autor principal del Declaration de Independentia del Statos Unite. Durante le Revolution American, ille representava Virginia in le Congresso Continental, serviva como Governator de Virginia, e depost como Ministro del Statos Unite a Francia. Sub George Washington, ille esseva le prime secretario de stato del Statos Unite, e sub John Adams, le secunde vicepresidente.
In le election de 1800, ille disfaceva John Adams e deveniva presidente le 4 de martio 1801.
Jefferson promoveva expansion al west per le acquision de Louisiana: le Statos Unite acquireva tote le territorio possedite per Francia in America del Nord (plus de 2 000 000 km2) al precio de $15 000 000, duplante le territorio del Statos Unite.
In le election de 1804 ille esseva decisivemente re-eligite.
In 1807 Jefferson firmava un lege prohibiente le importation de sclavos. Iste lege afficeva solmente le commercio international; illo nullemente impediva le commercio domestic. Jefferson ipse possedeva plus de 600 personas in sclavitude. Controversia circumfere su relation con un de illes, Sally Heming: il ha indicationes forte que ille esseva le patre de su infantes.
Durante un grande parte de su vita, Jefferson esseva in le processo de planar e construer, como architecto, su residentia principal, Monticello, un domo palatial in le stilo neoclassic. Ille fundava le Universitate de Virginia in 1819 e planava su architectura original. Monticello e le Universitate conjunctemente constitue un sito de Patrimonio Mundial del UNESCO.