Wikipedia:Nomenclatura

Iste pagina documenta un directiva de Wikipedia in interlingua.

Iste directiva es generalmente acceptate per le communitate, e deberea esser observate. Nonobstante, rememora applicar le senso commun e que il pote occasionalmente haber exceptiones.

In summario

Le titulos del articulos debe esser recognoscibile, concise, natural, precise e consequente.

Iste pagina contine un lista de directivas super como nominar paginas.

Generalmente, le nomination de articulos debe dar prioritate a lo que le majoritate del lectores de interlingua recognoscerea con major facilitate e con un minimo rationabile de ambiguitate.

Le proposito de iste directivas es render plus facile crear nove paginas con ligamines appropriate. Quando tu scribe paginas Wiki super qualcunque subjecto, nomines, parolas o expressiones que tu pensa que deberea esser ligate a information ulterior debe esser scribite inter [[parentheses quadrate]] a fin que illos appare como ligamines. Sequente conventiones consistente durante le nomination e le ligation augmenta le probabilitate que iste ligamines va conducer al loco correcte.

Es importante notar que istes es conventiones, non regulas scribite in petra. A mesura que Wikipedia cresce e evolve, alcun conventiones que un die faceva senso pote devenir obsolete. Mais in caso de dubitas, observa le convention.