Welut | |
---|---|
![]() | |
Welut sawah Monopterus albus | |
Klasifikasi ngèlmiah | |
Karajan: | Animalia |
Filum: | Chordata |
Klas: | Actinopterygii |
Ordho: | Synbranchiformes |
Subordho: | Synbranchoidei |
Famili: | Synbranchidae |
Genera | |
Macrotrema Monopterus Ophisternon |
Welut iku saklompok iwak awujud memper ula kang kalebu sajeroning suku Synbranchidae. Suku iki dumadi saka patang genera kanthi total 20 jinis. Jinis-jinisé akèh kang durung dirinci kanthi pepak saéngga angka-angka iku bisa owah. Anggotané asipat pantropis (tinemu ing kabèh laladan tropika).
Welut béda karo sidat, kang kerep dianggep padha. Welut imung duwé sirip ing buntut kang uga karedhuksi, déné sidat isih duwé sirip kang cetha. Ciri khas welut liyané ya iku ora mawa sisik (utawa mung sethithik), bisa ambegan saka udara, bukaan angsang ciut, ora duwé kanthong langi lan balung iga. Welut praktis minangka kéwan banyu tawa, déné akèh-akèhé sidat urip ing sagara sanadyan ana uga kang urip ing banyu tawa. Mata welut akèh-akèhé ora bisa fungsi kanthi apik; jinis-jinis kang manggon ing guwa malahan wuta.
Ukuran awak warna-warna. Monopterus indicus mung ukuran 8,5 cm, déné welut marmer Synbranchus marmoratus diweruhui bisa nganti 1,5m. Welut sawah, kang biyasa tinemu ing sawah lan didol kanggo mangan, bisa dawané nganti watara 1m (sajeroning basa Betawi karan moa).
Akèh-akèhé welut ora seneng nglangi lan luwih seneng ndhelik ing sajeroning blethok. Kabèh welut iku pamangsa. Pratélan mangsané racaké wujud kéwan-kéwan cilik ing rawa utawa kali, kaya ta iwak, kodhok, gegremet, sarta krustasea cilik.